Urola Kostako Hitza

Hona hemen Jokin Argote (Getaria, 1982) pilotariari egindako elkarrizketaren aurrerapena. Elkarrizketa osoa biharko egunkarian irakurri ahal izango duzue.

Aurkari izango duzun Iñigo Diazek mendean hartu zituen ligaxkako partidan, 22-11 markagailuarekin. Beldurrik baduzu?
Ez dut beldurrik, kontrakoa baizik. Errebantxako gogoa dut! Orain artean, bera izan da txapelketako pilotaririk onena. Jokoz oso txukun dabilela erakutsi du, eta ligaxkako norgehiagokan egurra eman zidan. Hala ere, ni nahiko lasai nago. Jakin badakit partida oso zaila izango dudala aurrean, eta faboritoa bera dela. Hori horrela izanda, presio gehiago izango duela esango nuke. Ni, behintzat, dudan onena ematera joango naiz kantxara, eta ahal izanez gero, ezustekoa eman eta txapela irabaztera.

Finaleko irabazleak datorren urteko lehen mailako lau eta erdiko txapelketan jotzeko txartela lortuko du. Zuretzat zer litzateke garrantzitsuagoa txapela irabazte ala datorren urtean goiko pilotariekin lehian aritzea?
Garrantzitsuena txapela irabaztea da! Azken finean, txapela betiko izango duzulako. Txapelarekin batera, datorren urtean lehen mailakoekin aritzeko aukera ematen dizu eta hori ere sekulakoa da. Hitz handiak dira, zalantzarik gabe. Goiko horien artean benetan nekeza izango litzateke partidak bat irabaztea...

Oraindik alde handia dago lehen eta bigarren mailako jokalarien artean?
Nik uste dut alde nahi nabarmena dagoela. Txartela lortuz gero, gogor entrenatu beharko nuke eta pilotalekuan ikusi beharko genuke. Baina aldea badago, bai!