Urola Kostako Hitza

'Gure arrantza defenda dezagun' lelopean antolatutako mahai-inguruan parte hartu zuten astearte arratsaldean Getariako Kofradiako lehendakari Emeterio Urrestik eta LABeko arrantza ordezkari Leo Belaustegik. Ekitaldia Alondegian izan zen eta moderatzaile lanetan, bien bitartean, Bartolo Iribar aritu zen.

Bartolo Iribarrek Euskal Herriko arrantzaren eta arrantzaleen egoera delikatuaren inguruko hainbat datu jarri zituen mahai gainean, Emeterio Urrestiri eta Leo Belaustegiri hitza eman aurretik. Iribarrek galdera zuzena egin zien biei: "Lehen pausoa egoeraren larritaswunaz jabetzea da. Behin horretaz jabetuta, zein neurri hartu beharko lirateke irtenbide batetara iristeko?"

LABeko ordezkariaren arabera, "guk harrapatzen dugun arraina guk geuk komertzializatzen ez badugu, jai dugu. Arrantzatzen dugunari etekina atera behar diogu, baina egoera guk kontrolatzen ez badugu, ezinezkoa izango da". Adibide gisa, honakoa planteatu zuen Belaustegik: "Pescanovak arraina harrapatu, garbitu, xerratan moztu eta izoztu egiten du, ondoren merkatuan saltzeko. Guk bide hori jarraitu behar dugu, merkatuan lehiatu nahi badugu".

Getariako kofradiako lehendakariaren hitzetan, Belaustegiren arrazoiketak "oso polita dirudi, baina ez da batere erraza". Komertzializazioaren gaia horren garbi ikusi ez, eta beste neurri batzuk hartzearen aldeko agertu zen Urresti: "Gaur egun jendeari berdin zaio merkaturatu den arraina nongoa den eta nola harrapatu den, espezieari bakarrik ematen dio garrantzia. Gure arrantza egiteko modua oso selektiboa da, kalitateduna, baina erosleek ez dute hori kontuan hartzean. Denok baldintza berdinetan ibili beharko genuke, baina Europak ez du hori ikusi nahi. Guztientzako baldintza berak jartzen ez diren bitartean, lehiakortasuna handituko da".

Entzuleen artean zegoen arrantzale batek aditzera eman zuenez, "lana egiten dugun moduan, ezinezkoa da komertzializazioa guk geuk aurrera eramatea. Izan ere, 5 hilabetez egon gaitezke arrantzan eta gero ezer ez. Eta Pescanova bezalako enpresak, berriz, urte osoan ari dira harrapatu eta harrapatu. Gobernuak jarri behar ditu hemen neurriak: arantzelak jarri behar ditu, hain zuzen".