Urola Kostako Hitza

Getariako Kostabela bela elkarteak datorren larunbatean jokatuko den IX. La Gaviota estropada aurkeztu du gaur goizean, Getariako Balearri jatetxean. Guztira, 30 bat ontzik parte hartuko dute 50 milako ibilbidea duen bela lasterketan; parte-hartzaileek Bermeoko La Gaviota plataformara joan etorria egin beharko dute, abiapuntua eta helmuga herriko kirol portua izanik. Aurkepen ekitaldian Kostabelako lehendakari Salba Manterolak, elkarte bereko Kruzero saileko arduradun Jexux Iturriozek eta Getariako alkate Andoni Aristik parte hartu dute.

Estropadari larunbat eguerdian emango diote hasiera, 12.00ak aldean, nabigatzaileei probako arauak eta eguraldiaren aurreikuspenak banatu ondoren. Antolatzaileek azaldu dutenez, eguraldi ona eta hego haizea aurreikusten da aipatutako egunerako.

Txapelketa Kostabelak antolatzen du, Euskadiko Kirol Portuaren eta Getariako Udalaren laguntzarekin, eta euskal kostaldean gauez nabigatzen den lehenengo proba da; izan ere, helmugaratzen diren lehen ontziek 10 eta 12 ordu inguru behar izaten dituzte joan-etorria osatzeko.

Estropadaren irabazleak Artzapen dagoen Joan Sebastian Elkanoren estatuaren brontzezko erreplika bat jasoko du. Oroigarria jabetzan lortzeko, parte-hartzaileek 3 aldiz segidan irabazi beharko dute proba eta 5 aldiz txandaka. Azken bi urtetan Zumaiako Rikardo Peñaren Ausart ontzia izan zen bizkorrena eta, antolatzaileek aditzera eman dutenez, hirugarren garapenaren bila doa aurten. Sariak igandean, maiatzaren 4an, banatuko dituzte kirol portuan bertan; hitzordua 13:00etan jarri dute.